TIRANË- Finalizohet një operacion i gjërë antidroge i shtrirë në disa shtete. Zv/drejtori i Përgjithshëm i Policisë, në seksionin e Krimeve të Rënda, Ardian Çipa në një konferencë për shtyp bëri me dije se është finalizuar me sukses operacioni i koduar “Ballkani”, i shtrirë në shtete si Shqipëria, Kosova, Maqedonia, Mali i Zi dhe Turqia.
Hetimet që çuan në gjurmët e grupit të strukturuar kanë nisur që në vitin 2015-të, ndërsa mësohet se të përfshirë janë disa biznesmenë shqiptarë në fushën e ndërtimit.
Nga hetimet bëhet me dije se grupi trafikonte lëndë narkotike të llojit kokainë heroinë, kanabis e marijuanë. Ndërsa kokaina e heroina vinin në Kosovë e Shqipëri përmes Turqisë.
Mësohet gjithashtu se në Shqipëri janë arrestuar 14 persona, ndërsa dy janë shpallur në kërkim. Të përfshirë në trafik janë biznesmenët Jurgen Molla, i njohur edhe si Miri Molla, bashkëpronar i Molla SHPK. Shyqyri Kotorri, Anesti Koromani investitor në fushën e ndërtimit, Nuredin Nazëraj pronar i një hoteli në Vlorë, Lulzim Qorri, Denis Sinamati dhe një biznesmen nga Kosova.
Ndër të tjera Cipa tha se organizatorët janë nga Turqia. “Është kapur një sasi e madhe droge. Persona të tjerë organizator janë nga Turqia, dhe nga Kosova.”, tha Cipa.
Kreu e Prokurorisë së Krimeve të Rënda Adnan Xholi deklaroi se do të vijojë hetimi dhe dokumentimi i këtij rasti trafikimi.
“Krahas dokumentimit të kësaj vepre, prokuroria për krimet e renda për vijim do vijojë të kryejë me veprime të tjera që ka të bëjë me aplikim të masave ndaluese dhe parandaluese. Gjej rastin të shpreh vlerësimet e mia për gjithë angazhimin e strukturave të Policisë së Shtetit, bashkë me prokurorë dhe oficerë në këtë rast, duke vlerësuar punën e tyre. Si drejtues i prokurorisë për Krimet e rënda, i shpreh Policisë së Shtetit angazhimin tonë, për këto çështje.”, tha Xholi.
Ndër të tjera Çipa është pyetur edhe për grabitjen në Rinas, ndërsa ai e cilësoi atë një ngjarje të rëndë. Çipa tha se çështja është në hetim. “Policia është e angazhuar për të zbardhur ngjarjen dhe këtë rast të rëndë. Autorët janë shpallur në kërkim.”, tha Çipa.
