Bledar Dervishaj, përfaqësuesi ligjor i presidentit Ilir Meta ka dalë në një deklaratë për shtyp nga presidenca, ku ka publikuar pretendimet e ngritura në gjykatë për mbrojtjen e kreut të shtetit.
Ai deklaron se Kuvendi ka shkelur 13 herë Kushtetutën. Një prej shkeljeve, është rendi i ditës i vendosur nga kryetari i Kuvendit që nuk kishte dy çështje por një. Ndërsa shkelja e tretë lidhet me faktin se referuar rregullores të Kuvendit nuk kishte kërkesë për shtesa në rendin e ditës. Dervishaj ndër të tjera ka deklaruar se kuvendi ka depozituar në Gjykatën Kushtetuese prova shtesë për mbrojtjen e presidentit Ilir Meta.
“Një prej shkeljeve të konstatuara nga ana jonë ishte edhe fakti që në datën 7 maj në vitin 2021 kur u miratua ngritja e Komisionit Hetimor, Kuvendi kishte bërë tre shkelje. Rendi i ditës ishte caktuar nga ish-kryetari i Kuvendit në datën 6 maj për në datën 7 maj, pra nëse do t’i kthehemi ngjarjeve, Kuvendi thirrje për këtë ngjarje për një afat më pas se 24 orë. Në rendin e ditës nuk kishte dy çështje, por kishte një. Seanca plenare të nesërmen mori dy vendime, shkelja e tretë që kemi pretenduar kishte të bënte me faktin se referuar rregullores së Kuvendit nuk kishte kërkesë për shtesa në rendin e ditës”, deklaron ai.
