Në konferencën për Këshillimin Kombëtar, kryeministri Edi Rama i është përgjigjur pyetjes nëse shkarkimi i Ervin Bushatit nga Posta Shqiptare lidhet me pyetjet e Këshillimit Kombëtar. Duke u munduar t’i bëjë bisht pyetjes, Rama tha se kjo nuk është puna e tij dhe refuzoi të përgjigjet.
“Ndonjëherë pyes veten e keni seriozisht. Jemi pushtet legjislativ. Nuk pezullojmë ne qeveria gjykatësit por bëjmë një ndërhyrje në legjislacion. Nuk vazhdojnë punën këta dhe të vazhdojnë të bëjnë gjëma. Edhe vendimi im ka qenë siç është si i qytetarëve. Mbështetja e qytetarëve për këto vendime na jep përgjegjësi më shumë. Do e bëjmë siç kemi bërë gjërat që kemi thënë. Gjërat që unë them, bëhen është çështje kohe. Se përndryshe nuk i them. Sa i përket drejtorit, unë nuk përgjigjem se nuk është puna ime fare, nuk është temë për këtë sallë”, tha Rama.
Bushati u zgjodh në krye të Postës Shqiptare në muajin shtator të vitit të kaluar, ndërsa u shkarkua vetëm pak muaj më pas në mars të këtij viti, për arsye ende të panjohura.
