Rezerva energjetike në kaskadë është 1.4 milionë megavat/orë.
Shiu i natyrës është kthyer në “shi parashë” për KESH-in. Financat e Korporatës janë në ditët më të mira pasi Kaskada e Drinit prej muajsh ka patur rezervë ujore për të punuar në kapacitet të plotë. Vetëm për muajin maj vlera e arkëtuar e të ardhurave nga shtija e energjisë është 12 milionë euro. “Prodhimi ditor i energjisë gjatë këtij muaji ka qenë rreth 20 mijë megavat orë. Që prej datës 1 maj, KESH po mbulon gjithë kërkesën e vendit për energji elektrike, përfshi humbjet e OSHEEsë në rrjetin e shpërndarjes, rreth 101.7 mijë megavat orë (deri më në fund të muajit maj), duke sjellë të ardhura shtesë prej rreth 3.3 milionë euro. Ndërkohë sasia shtesë të energjisë së prodhuar gjatë periudhës 1 deri më 31 maj 2016 është shitur në tregun e parregulluar. Në total janë eksportuar rreth 311.3 mijë megavat orëme një vlerë monetare prej rreth 9 milionë Euro”, konfirmon KESH. Ndërkohë korporata njofton se rezerva energjetike e akumuluar aktualisht në kaskadë është 1.4 milionë megavat/orë.
