Shumica e kompanive raportojnë humbje
I parë më entuziazëm nga shumë investitorë, tregu i shitjeve on line në Shqipëri po përballet me problem të shumta. Mungesa e infrastrukturës së blerjeve dhe sigurisë së transaksioneve ka bërë që operatorët e këtij tregu të mos arrijnë të kenë të ardhura të kënaqshme. Kompanitë e para të shitjeve online në Shqipëri, që filluan të shtohen ndjeshëm rreth tre vjet më parë, po rezultojnë me të ardhura minimale dhe janë ende me humbje, mbylljet nuk mungojnë, ndërsa operatorët e huaj po tërhiqen. Xhiro e kompanisë më të madhe në këtë segment nuk i kalon 150 mijë euro, ndërsa të tjerët qarkullojnë deri në 30 mijë euro në vit.
Mjaft nga kompanitë vendase të regjistruara në QKR në bilancet e tyre raportojnë ose rënie të të ardhura ose humbje. Një fat të ngjashëm kanë patur edhe projektet e huaja që kanë provuar të operojnë në Shqipëri. Një prej tyre “Rocket Internet” në Shqipëri u mbyll pa filluar mirë. Por ka edhe biznese që janë në hapat e parë të lulëzimit të tilla si Zero.al, Ikub Albania, apo Dyqani taxi, që kanë rritur ndjeshëm të ardhurat. Dy janë vështirësitë e zhvillimit të këtij tregu në Shqipëri: infrastruktura e blerjes dhe siguria e transaksioneve. Këtyre u shtohet dhe kultura e munguar e blerjeve online.
