Pas dy muajsh hetime intensive nga Prokuroria e Tiranës mbrëmjen e djeshme është arrestuar nga policia e kryeqytetit Ahmet Muça, pronari i ish-Universitetit Kristal.
Ahmet Muça akuzohet për falsifikim dhe shitje diplomash false. Në kërkim është shpallur edhe një tjetër person, i cili dyshohet se ka bashkëpunuar duke ndihmuar Muçën për shitjen e diplomave.
Universiteti Kristal ka më shumë se 3 vite që është mbyllur me vendim të qeverisë Rama, por pavarësisht këtij fakti, Muça në muajt e fundit kishte vijuar që të shiste diploma me vlera që variojnë nga 2500 euro.
Diplomat lëshoheshin me datën dhe vulat kur “Kristali” ishte i hapur. Biznesmeni i njohur ka pajisur me diploma disa persona që nuk rezultojnë të regjistruar.
Nga hetimet mësohet se Muça u ka shitur kohët e fundit disa personave diploma me logon e ‘Kristalit’. Pas informacioneve, Muça u vendos në hetim nga Prokuroria e Tiranës dhe në përfundim u dokumentua vepra penale e falsifikimit dhe shitjes së diplomave false duke e arrestuar, ndërkohë që është shpallur në kërkim edhe personi tjetër me inicialet E.P.
