Bashkia e Shkodrës ka depozituar këtë të enjte kallëzim penal në Prokurorinë e Shkodrës ndaj IKMT dhe drejtorisë vendore të policisë Shkodër, pas shembjes së ndërtesave në Velipojë.
Në Kallëzimin Penal, Bashkia e Shkodrës akuzon IKMT dhe policinë për shpërdorim detyre.
“Bashkia Shkodër me cilësinë e kallëzuesit, vlerëson se Inspektoriatit Kombëtar i Mbrojtjes së Territorit dhe Drejtoria Vendore e Policisë së Shtetit nuk kanë vepruar drejt dhe ligjërisht, por kanë «shpërdoruar detyrën» që i ngarkon ligji në aksionin e organizuar për prishjen e 24 objekteve «beach-bare», në datën 10.06.2020 dhe 11.06.2020, në bregdetin e Plazhit të Velipojës, Njësia Administrative Velipojë” thuhet në padi.
