Mëngjesin e sotëm policia e Tiranës ka nisur aksionin për shembjen e tregut të rrobave të përdorura në Tiranë, i njohur si tregu pranë spitalit nr.5. Ky aksion ka shkaktuar tension tek tregtarët rom të cilët e kishin tregun biznesin e tyre.

Tregtarët thonë që aksioni i nisur në orën 04:00 në mëngjes ishte i papritur edhe pse pohojnë se janë lajmëruar 4 ditë më parë nëpërmjet një mesazhi. Ata kanë kundërshtuar ndyrhyrjen e policisë të cilët sipas tyre u kanë dëmtuar të gjithë mallin.

Gjatë përplasjes fizike me punonjësit e policisë një grua rreth të të 50-ave është ndjerë keq dhe ka humbur ndjenjat. Në vendngjarje ka mbërritur ambulanca e cila i ka ardhur në ndihmë gruas dhe është në gatishmëri të personave që mund të lëndohen nga përplasja me policinë.

Ja si shprehen tregtarët:

Tregtar: “Është me kancer ajo gruaja që u sëmur. Është më fëmijë me halle ku të shkojë e shkreta. Edhe unë tregtare këtu jam. Kisha marrë 5 mln lekë borxh për të marrë mallin. E tani çdo gjë u prish. Kam 5 mln lekë borxh, një plakë të paralizuar, fëmijë. Jetoj në një barake. Ku të shkoj. Do t’i paguajmë taksat se s’kemi ku të shkojmë. Ku do mbytemi. Me çfarë të jetojmë.

Kisha parfum, bizhuteri. Nuk na thanë që do i prishim. Malli është bërë copë-copë. Paguanim përditë detyrimin. 5 mijë lekë çdo ditë. Nuk dimë ku do shkojmë. Kam tre fëmijë, as burri në punë as unë. Kur të vijë puna e votave vijnë e na kërkojnë. Atere kujtohen për romët”

Tregtar: “Nuk kemi pasur asnjë lajmërim. Kemi patur lajmërim 3-4 ditë para me mesazh, duke na thënë do ju nxjerrim. I thamë keni punë me pronarin jo me ne”.

Tregtar: “Pse nuk vjen Erion Veliaj të përgjigjet për romët. Jam me 4 fëmijë. Edhe për të lypur s’të lënë në rrugë, as për punë. Çafër të bëjmë ne. Na torturuan që në 4 të mëngjesit”