Shtetet e Bashkuara po mendojnë tërheqjen nga organizmi i OKB-së, përgjegjës për të drejtat e njeriut.
Kështu ka njoftuar ambasadorja amerikane në Kombet e Bashkuara, Nikki Haley duke nxjerrë si argument se është vështirë të pranohet fakti që janë kaluar 5 rezoluta kundër Izraelit, aleat i ngushtë i Amerikës, por askush nuk ka marrë mundimin të diskutojë situatën në Venezuelë.
Në një artikull të botuar më herët në gazetën “Washington Post”, Haley shkruante se Këshilli duhet t’i japë fund praktikës së gabuar të drejtimit të gishtit nga shteti hebre për kritika.
Ambasadorja tha se nuk është bërë mjaftueshëm për të kritikuar Iranin, një vend me të dhëna të tmerrshme të të drejtave të njeriut, dhe Venezuelën e përfshirë nga trazira të mëdha politike, ku këto muajt e fundit janë vrarë me dhjetëra protestues.
