Pas dy vitesh shkëputjeje që nga pandemia e Covid-19, maturantët në gjithë Shqipërinë po festojnë festën që kremton mbylljen e ciklit të 3 viteve studimeve pra gjimnazin. Tradita e ceremonive të diplomimit u rikthye edhe te gjimnazistët e shkollës së mesme Qemal Stafa, të cilët u mblodhën te amfiteatri i Liqenit të Tiranës për të festuar suksesin e 3 viteve. Me emocione për përfundimin e gjimnazit dhe ethet e rrugëtimit të ri që do të nisin, universitetin, puna e maturantëve më të mirë u shpërblye me certifikata vlerësimi.
“Ky kurorëzim pas pandemisë dhe vështirësive është shumë i bukur.”
“3 vite kaluan shumë shpejt, jemi rritur së bashku e jemi bërë më të fortë për të ardhmen për të përballuar jetën, sfida të tjera na presin”, shprehen maturantët. Përballë prindërve të tyre e mësueseve, të rinjtë shprehën mirënjohjen. Teksa vetë mësuesit përgjatë mësimdhënies në kohën e covidit, gëzohen për triumfin e nxënësve të tyre në përfundim të 3 viteve gjimnaz.
