Tenistja amerikane, Serena Williams, ka mundur thellë polaken Agnieszka Radwanska në gjysmëfinale, me rezultatin 6-0, 6-4
34-vjeçarja amerikane kaloi me lehtësi mbresëlënëse kundërshtaren, që për hir të së vërtetës nuk është ndër më të thjeshtat për t’u përballur. Për të mbyllur setin e parë, tenistes Williams, i mjaftuan vetëm 20 minuta lojë, duke e lënë kundërshtaren me zero pikë. Polakja 26-vjeçare provoi të qëndronte në ndeshje dhe duke shfrytëzuar të vetmin moment që rivalja humbi përqendrimin, në setin e dytë rikuperoi nga disavantazhi 1-3 në 4-3. Vetëm një iluzion për Radwanska-n, që nuk arriti të përballonte forcën e numrit një në botë. Rivalja e Serena-s për titullin është gjermania Angelique Kerber, që në gjysmëfinalen tjetër mposhti britaniken Johanna Konta në dy sete, me rezultatin 7-5, 6-2.
