Teknologjia ka shtrirë “tentakulat” e saj në çdo aspekt të jetës njerëzore. Dokumentimi i momenteve të bukura në celular është shndërruar në mani për jo pak njerëz. Thuajse të gjithë e pranojmë se gjithçka është më e bukur nëse shijohet dhe jetohet pa u shqetësuar që ta filmojmë me celular, megjithatë pak prej nesh i rezistojnë kësaj “sëmundje” moderne.
Prezenca e celularëve vërehet më shumë se kudo në koncerte, e kjo u bie në sy edhe këngëtarëve, të cilët me siguri humbasin një farë lidhjeje me publikun e tyre. Së fundmi është Ermal Meta që vë në dukje këtë dukuri. “Këndoj për njerëzit e mi…dhe celularët e tyre”, shkruan ai, ndërsa me smile bën një fytyrë të nevrikosur e një tjetër të qeshur, si për ta thënë me humor se kjo dukuri nuk i pëlqen fort.
