Drejtuesi i SPAK, Klodian Braho, gjatë një konference të përbashkët me autoritetet e Antimafias Italiane, deklaroi se operacioni i zhvilluar mes Shqipërisë dhe Italisë është rezultat i një hetimi të gjatë, të përbashkët dhe të koordinuar mes institucioneve ligjzbatuese të dy vendeve.
Braho deklaroi se gjatë hetimeve janë sekuestruar rreth 1 milion euro cash, ndërsa me kërkesë të Prokurorisë, GJKKO ka vendosur sekuestrimin e pasurive të tjera, përfshirë shoqëri tregtare, automjete dhe llogari bankare.
Braho: Ky është një rezultat i përbashkët. Në lidhje me këtë çështje janë ekzekutuar 15 masa, 10 janë ekzekutuar nga Gjykata e Shkallës së Parë në Tiranë. Është një element i rëndësishëm i këtij rasti, jo vetëm goditja e këtij aktiviteti të krimit të organizuar të drogës, por dhe produkti i krijuar nga ky aktivitet i paligjshëm.
Gjatë hetimeve paraprake janë sekuestruar rreth 1 milion euro para në gjendje cash. Po kështu nga GJKKO në Tiranë, janë sekuestruar pasuri të tjera, llogari bankare, shoqëri, që dyshohet se janë krijuar nga veprimtari kriminale. Dua të përmend operacionit “Shpirti”, “Kulmi” dhe “Ura” ku u dënuan penalisht 167 persona dhe për 145 prej tyre janë dhënë dënime të konsiderueshme nga 12 vite burg e deri në 20.
