Përzgjedhja e sekretarëve në dorë të kreut socialist Rama
Katër nga ministrat e kabinetit Rama do të duhet të lënë postet e tyre drejtuese në Parti. Në statutin e ri të PS thuhet se: “Funksioni i sekretarit të partisë është i papajtueshëm me funksionin e anëtarit të kabinetit qeveritar si dhe me çdo lloj funksioni tjetër ekzekutiv me kohë të plotë”. Kështu nga Sekretariati i vjetër socialist me 9 sekretarë, 4 ministrat: Damian Gjiknuri, Arben Ahmetaj, llir Beqaj dhe Blendi Klosi nuk do të mund të jenë më drejtues. Me formulimin e bërë në statut kreu i socialistëve Edi Rama do të ketë dorë të lirë që përzgjedhjen e tij ta bëjë jashtë kabinetit, por me mundësinë për të përfshirë në mesin e sekretarëve të PS deputetë, pasi statuti nuk përcakton papajtueshmëri të funksionit të sekretarëve me atë të deputetit. Sipas dokumentit që u miratua në kongresin e 19 marsit, është “Kryetari i partisë, i cili i paraqet Asamblesë Kombëtare për miratim kandidaturat për sekretarë ekzekutivë të partisë”. Por procesi pritet të hapet pas 9 prillit, datë e përcaktuar për referendumin socialist për mandatin e kryetarit. Edi Rama, në përzgjedhjen e tij, do të duhet të përqendrohet pikërisht në grupin parlamentar, por nuk përjashtohet edhe futja e emrave të rinj nga Asambleja Kombëtare.
