Kuvendi do të zhvillojë seancën e radhës këtë të enjte ku pritet që të votohen propozimet e mazhorancës për të ndryshuar Kushtetutën për zgjatjen e mandatit të afateve të Vettingut.
Në lidhje me këtë proces duhet se opozita është e ndarë pasi grupi i ish-kryeministrit Berisha është kundër shtyrjes së mandatit, ndërsa deputetët e Bashës akoma nuk kanë një vendim në lidhje me qëndrimin e tyre dhe pritet që të mblidhen në orën 09:00. Sipas propozimit të shumicës, zgjatja e mandatit duhet të bëhet deri në fund të viti 2024.
Një tjetër çështje e rëndësishme që do të diskutohet sot në Kuvend është edhe porti i Durrësit. Ministrja e Energjetikës dhe Infrastukturës do të zhvillojë një interpelancë me deputetin e Partisë Demokratike, Ferdinand Xhaferri. Qeveria nuk e përjashton mundësinë që miliarderi arab, Mohamed Alabbar të tërhiqet nga projekti 2 miliardë eurosh për ndërtimin e portit turistik të Durrësit dhe t’ia kalojë shitjen e plotë të aksioneve te një kompani tjetër, që mbetet ende misterioze.
Balluku tha dje për mediat se kompania statusin e investitorit e ka marrë nga AIDA. Ndërsa akuzat për “fantazmë”, Balluku tha se janë pretendime të opozitës, pasi sipas saj lëvizjet mes kompanive janë normale për sa kohë ato kanë akte ligjore.
Në seancën e sotme plenare, që parashikohet të nisë në orën 10:00, do të ketë diskutime të shumta rreth kësaj çështje, ndërsa pritet të ketë edhe debate.
