Partia Demokratike ka reaguar ndaj vazhdimit të seancës parlamentare në orën 18:00, gjatë të cilës lejohet vetëm bërja e pyetjeve me shkrim, mbi të cilat do të debatohet në seancën e nesërme.
Me anë të një deklarate për shtyp PD thotë se këto seanca përdoren vetëm për të favorizuar reklamën dhe propagandën e kryeministrit dhe asnjëherë nuk i kanë shërbyer qartësimit mbi programin qeverisës së katër viteve të ardhshme qytetarëve.
Deklarata e plotë
Vazhdimi i seancës në orën 18.00 sipas procedurës së rregullores së Parlamentit lejon vetëm depozitimin e pyetjeve me shkrim pa të drejtën e replikës apo debatit.
Eksperienca dhe historiku i këtyre seancave ka treguar që, drejtimi i pyetjeve pa mundësi për debat është keqpërdorur për të marrë kohën e një propagande elektorale.
Koha e përgjigjeve asnjëherë nuk i ka shërbyer qartësimit programor për qytetarët, por ka favorizuar reklamën e propagandën e kryeministrit.
Partia Demokratike do të bëjë opozitë të vërtetë dhe përmbajtësore. Partia Demokratike nuk do t’i japë asnjë shans kësaj maxhorance të keqpërdorë kohën në favor të publiciteteve varfëruese për shqiptarët.
Për rrjedhojë vendimi i Grupit Parlamentar i Partisë Demokratike, është të mos drejtojë pyetje që i japin mundësi propagandës qeveritare.
Pyetjet dhe çështjet që shqetësojnë qytetarët do të ngrihen gjatë seancës së debatit ku secili deputet do të ketë mundësinë të mbrojë gjatë fjalës së tij qëndrimet dhe argumentet në favor të qytetarëve.
