Shoqata e Infermirëve të Shqipërisë ka reaguar në lidhje me skandalin e ndodhur tek Covid 2, ku një sanitare duke u hequr si infermiere i ka marrë 8 mln lekë familjarëve të një pacienteje e cila ka ndërruar jetë nga Covid.
Përmes një reagimi për mediat shoqata thekson se ky nuk është rasti i parë dhe në lidhje me një ngjarje të tillë i bën thirrje ministrisë dhe prokurorisë që të hetojë deri në fund në lidhje me këtë çështje.
Ndër të tjera shoqat kërkon dhe hetimin e plotë të dosjeve të personelit që ushtron ligjërisht dhe të verifikohen të gjithë dosjet e infermirëve.
Reagimi i plotë:
Shoqata e Infermiereve të Shqipërisë e dënon aktin e korrupsionit të ndodhur në Spitalin “Shefqet Ndroqi” në emrin e përdorur të Infermierit.
Duke qenë se nuk është i pari rast që persona të ndryshëm bëjnë akte të tilla dhe kudo njolloset emri i Infermiereve duhet të jenë të dënueshëm.
Shoqata e Infermierëve i bën thirrje Ministrisë së Shëndetësisë dhe Mbrojtjes Sociale,Prokurorisë dhe çdo instutucioni përgjegjës që të hetojë rastin deri në fund duke nxjerr të gjithë të përfshiret në këtë rast korruptiv me pasojë vdekjen e pacientes.Pamvarsisht titujve dhe pozicioneve që kanë personat e përfire përpara drejtësisë dhe ligjit të gjithë duhet të jenë të barabartë.
Gjithashtu duhen hetuar dhe të gjithë dosjet e personelit që ushtron profesionin sa të rregullt janë ligjërisht në ushtrimin e profesionit të tyre pasi prej kohësh kemi bërë thirrje që të verifikohe dosjet e Infermiereve pasi një numër i konsiderueshëm e ushtrojnë profesionin në shkelje si: pa lejen e ushtrimit të profesionit ose pa kualifikimet e duhura,persona që nuk plotësojnë kriteret për të qenë në një pozicion por për shkak të shumë arsyeve ato janë në atë pozicion dhe kanë sjell dëmtim të sistemit.
Kërkojmë një hetim të drejtë dhe transparent të gjithë personelit dhe punës së bërë në të gjithë spitalet covid dhe për të gjithë personat në pozita drejtuese pasi asnjë veprim i asnjë personeli nuk bëhet pa vënë në dijeni shefin apo kryeinfermierin e çdo pavioni ku punon,kjo hedh hije dyshimi që në këto kohë fatkeqësisht nga heronjë janë kthyer në vrasës të pacientëve.
Jo të gjithë duhen futur në një thes por të përlyerit në këto lloj korrupsionesh që kanë pasojë jetën e pacientit duhen dënuar dhe të behen shembuj për në vazhdim.
Korrupsionin në çfarëdo lloj forme nuk e justifikon as lodhja,as stresi,as pagat e ulta,asgjë tjetër.
Duke shpresuar që hetimet e kësaj çështje dhe e çdo denoncimi tjetër të bërë si për humbjet e jetëve të pacientëve kohë më parë dhe e rasteve të korrupsionit të zbardhen deri në fund.
Shoqata e Infermiereve distancohet nga çdo lloj rasti të tillë ku profesionist janë të përfshirë në afera të tilla por qëndron fort në krah të çdo profesionisti të ndershëm që mundohen që mën emrin e tyre apo të infermierëve të përbaltin figurën dhe punën e infermierëve që në çdo kohë janë të parët ne frontin e parë për tu shërbyer pacientëve dhe jo politikës,shefave,kordinatorëve,administratoreve apo kryeinfermierëve.Pasi betimi që çdo profesionist ka bërë është bërë për ti shërbyer pacientit e askujt tjetër.
