Për skuadrën e Sarit është e ndalur të bëj hapa fals, pasi për të ndjekur Juven nuk mund të jesh ndryshe, përveçse perfekt. Ndoshta i ndjerë nën këtë presion, Napoli nuk e nisi mirë ndeshjen ndaj Xhenoas në “San Paolo”. Pëson një gol të shpejtë nga Rinkon në të 10’, që mbeti në fuqi edhe për 41 minuta të tjera. Në pjesën e dytë (në të 51’ dhe 81’) u desh që Gonzalo Higuain të nxirrte dy perla të tjera nga repertori i tij, si për të konfirmuar edhe një herë edicionin e shkëlqyer që po bën, konkretizuar me 31 gola të shënuar, 29 prej të cilëve në kampionat, pikërisht aq sa ka shënuar Edison Kavani tre vjet më parë. Pas avantazhit 2-1 dhe largimit nga fusha e Çerçit të dëmtuar, u desh vetëm goli i El Kadurit, që Napoli të vazhdojë të mbetet -3 nga Juventus. Për këta të fundit nuk ka më derbi, por thjesht një dominim të një qyteti të tërë për 90 minuta, sikur të ishte lojë fëmijësh. Pol Pogba, Sami Kedira dhe dy herë Alvaro Morata bën që goli i Belotit nga pika e bardhë të shërbente për të treguar vetëm një gjë, që edhe skuadra “granata” ishte prezente në atë stadium. Në fakt Torino ishte thjeshtë viktima e një shfryrje të dhunshme, pas fatkeqësisë së Mynihut.
