Ish deputeti i PD, Ervin Salianji deklaroi se do të publikojë në vazhdim prova dhe fakte të reja që tregojnë lidhjet në trafikun e drogës, të vëllait të ish-Ministrit të Brendshëm, Agron Xhafaj.
I ftuar në ABC news, Salianji tha se Agron Xhafaj është ortak dhe partner, me personat që janë kapur përpara disa muajve me tonelata droge në shtetin grek.
Juli Xhokaxhi: Jo më larg se dje keni deklaruar se do të publikoni prova dhe fakte të reja. A mund të na thoni dicka?
Ervin Salianji: E kam thënë pak, por po pres që të marr konfirmime të plota, nga i njëjti grup i strukturuar kriminal që ka denoncuar gazetari dhe Albert Veliu, në Gusht, janë kapur tonelata me drogë në Greqi, disa skafe, të cilët janë ortakë, partnerë dhe shoferë, që rrinë gjithë kohën bashkë me Agron Xhafajn. Kështuqë në momentin që do ti faktojmë, do ti bëjmë publike. Ashtu sic thuhet dhe në Akt-ekspertimin britanik, që ka vërtetuar se zëri në audio-përgjim është i Agron Xhafaj, dhe ka përjashtuar kategorikisht një “Agron” tjetër (Agron Hyseni) që ka futur SHISH për të ngatërruar akt-ekspertimin. Pra kanë gjetur një “Agron” tjetër, që të bëjnë cfarëdolloj marifeti dhe ngatërrese, për të mbuluar Agron Xhafajn.
Juli Xhokaxhi: A po mblidhni prova të tjera?
Ervin Salinanji: Ka shumë prova aty që do të ndërtohej narrativa e cila duhet të ishte bërë tashmë. Ne do ti drejtohemi edhe SPAK në vazhdim për këtë çështje. Gjithsesi është shumë e habitshme që Agron Xhafaj, nuk doli kurrë me zë dhe figurë, për të mohuar se zëri në përgjime nuk ishte i tij, Ai e deklaroi këtë vetëm me një shkresë.
Ditën e djeshme Gjykata Penale e Tiranës mori vendimin për të akuzuarit në çështjen “Babale”.
Gjyqtari Artan Gjermeni vendosi që Ervin Salianji të dënohet me 1 vit burg. Ndërkohë dënoi me 3 vite e 5 muaj burg Albert Veliun dhe 2 vite burg për Fredi Alizotin ndërsa për Gazetarin Jetmir Olldashi gjykata vendosi dënimin e tij me 6 muaj burg të konvertuar në 100 orë shërbim komuniteti.
