Një pianist i jashtëzakonshëm me talent të madh gjendet në Tiranë. Ai është Zamir Kabo, i cili rikthehet në atdhe me koncertin për piano në A minor Op.16 të Edvard Grieg. Kjo është një nga veprat më të bukura të kompozitorit me famë norvegjez. Zamiri dinte shumë mirë të ishte romantik.lirik dhe t’i sulej si felin pianos, kur i duhej të jepte dinamizmin e madh të koncertit.
Ai ka qenë fatlum që e ka luajtur këtë koncert në sallën e Universitetit të Arteve, tek shoqërohej nga orkestra e Radio Televizionit nën drejtimin e Oleg Arapit.
Mbrëmja e së premtes ka qenë një festë e muzikës klasike, pasi nisi me “Kapriçot spanjolle” të Rimsky-Korsakov, vazhdoi me koncertin me piano të Grieg dhe përfundoi me simfoninë e 4 të Tchaikovsky.
Orkestra e Radio Televizionit është padyshim një visar i rrallë dhe takimet e së premtes me të në Akademinë e Arteve rrëfejnë se ka plot njerëz që e çmojnë së tepërmi, përderisa salla është përherë rrafsh me artdashës.
