Kremlini ka kritikuar një video të publikuar nga stafi i kandidatit republikan për president të SHBA-së, Donald Trump.
Sipas Kremlinit, kjo video demonizon Rusinë.
Dmitry Peskov, zëdhënës i presidentit të Rusisë, Vladimir Putin, tha se “pozicioni ynë për këtë është negativ”.
Ai tha se është e njohur tashmë që çdo fushatë zgjedhore, përpiqet të demonizohet Rusia.
Videoja e publikuar më 16 mars paraqet Putin duke rrëzuar një rival në një duel të xhudos.
Më vonë video ndërpritet dhe tregon një foto të asaj që duket se është një militant i Shtetit Islamik.
Më tutje, në video radhitet fotografia e kandidates demokrate, Hillary Clinton, duke lehur si qen, dhe pastaj del përsëri fotografia e Putinit duke qeshur.
Në këtë video bëhet përpjekje të hedhet dyshim në aftësinë e zonjës Clinton për t’u marrë me atë që në video cilësohet si kundërshtari më i ashpër i Uashingtonit, pra Moska.
