Pikërisht trembëdhjetë muaj më parë, vetëm tre ditë pas fillimit të pushtimit në Ukrainë, kombëtarja ruse u përjashtua me urdhër të FIFA-s nga të gjitha garat ndërkombëtare. Të nesërmen, edhe klubet e saj nuk patën më të drejtë të luanin në garat europiane.
Që atëherë, “Sbornaïa” është rishfaqur. Por për herë të parë që nga nëntori 2021, një takim u zhvillua në tokën ruse. Ky ishte të dielën në Gazprom Arena në Shën Pjetërburg (stadiumi që duhej të mirëpriste finalen e UEFA Champions League, vitin e kaluar). Përpara afro 24.000 shikuesve (nga një kapacitet prej 68.000) sipas Reuters, Rusia fitoi kundër Irakut 2-0, me golat nga Miranchuk dhe Pinyaev.
Ndeshja e fundit në tokën ruse datonte në 11 nëntor 2021. Kombëtarja e drejtuar nga Valeri Karpin mundi atë natë Qipron me rezultatin 6-0 në kualifikueset e Kupës së Botës. Tre ditë më vonë, ajo luajti ndeshjen e saj të fundit zyrtare, në të cilën u mposht 1-0 nga Kroacia në Split.
Që atëherë, Rusia ka luajtur vetëm katër ndeshje miqësore, kundër Kirgistanit (fitore 2-1), Taxhikistanit (barazim 0-0), Uzbekistanit (gjithashtu barazim 0-0), Iranit (barazim, kësaj radhe 1-1) të premten e kaluar dhe rrjedhimisht Irakut.
Ka patur shumë zëra se Federata Ruse e Futbollit planifikon të bëhet pjesë e Konfederatës Aziatike të Futbollit por deri tani asgjë nuk është konfirmuar 100%.
