Pas vendimit të Këshillit të Ministrave që i ka hapur dritën jeshile tenderit për ndërtimin e rrugës së Arbërit, kreu i qeverisë, Edi Rama ka reaguar duke thënë se pas 25 vjetësh premtime boshe e zhgënjime pas çdo votimi, viti 2017 është viti i nisjes së punës për këtë aks, që e bën Dibrën fqinje të afërt të Tiranës.
Me anë të një statusi në Facebook, Rama shkruan: Projekti i parë i Programit Kombëtar 1 Miliardë për Rindërtim hyri sot në fazën finale: RRUGA E ARBERIT.
Pas 25 vjetësh premtime boshe e zhgënjime pas çdo votimi, viti 2017 është viti i nisjes së punës për këtë aks, që e bën Dibrën fqinje të afërt të Tiranës dhe do t’i japë hov zhvillimit ekonomik, social e turistik të një zone të tërë bukurish e burimesh të jashtëzakonshme natyrore, që për çerekshekulli u la në rrënimin e harresës” shkruan ai.
Sipas ofertës, rruga do të kushtojë rreth 250 milionë euro dhe ndërtimi i saj do të zgjasë 46 muaj.
