Policia ka arrestuar sot 31 vjeçarin Florenc Shamo që prej 9 vitesh ishte në kërkim ndërkombëtar për vrasje. Shamo është dënuar me 14 vite burg për vrasjen e Ervis Dacit në 6 gusht të vitit 2007 në Itali. Shamo në momentin e arrestimit ishte transformuar fizikisht, pasi kishte kryer operacione plastike në Greqi . Ai kishte siguruar një kartë identiteti të falsifikuar ku mbante emrin Vincenco Xheracitano.
Edhe pse në kërkim nga interpoli, shtetasi kishte udhëtuar në plot shtete si Hollandë, Spanjë, Greqi dhe Shqipëri. Ai ishte akuzuar më parë se ka qenë pjesë e një bande shqiptare, e cila vrau Ervis Dacin. Vrasja u krye pas prishjes së pazareve për prostitucion në Firenze në vitin 2007.
Më 16 janar të 2009 Shamo u arrestua në Halikafs të Kanadasë, pasi kërkohej prej dy vitesh. Nuk dihet se në çfarë rrethanash është liruar nga autoritetet kanadeze, por tashmë u arrestua në Shqipëri dhe do t’u dorëzohet autoriteteve italiane.
