Janar-prill, kompanitë arkëtuan 3.8 miliard lekë
Rritja e taksave e ka dhënë menjëherë efektin në tregun e sigurimeve. Në katërmujorin e parë të vitit 2016 ndonëse janë shitur më pak polica sigurimi krahasuar me një vit më parë, të ardhurat e grumbulluara nga shitja e tyre kanë qenë më të larta duke kapur vlerën e 3.8 miliard lekëve. Sipas të dhënave të AMF për periudhën janar – prill 2016 primet e shkruara bruto kanë qenë 2 për qind më shumë se e njëjta periudhë e një viti më parë. Por në të njëjtën kohë numri i kontratave të lidhura ka rënë me 3.4 për qind, çka tregon se janë blerë më pak polica, por me çmim më të lartë. Drejtuesit e shoqërive të sigurimit thonë se kjo i dedikohet kryesisht rritjes së taksës së sigurimeve e cila aktualisht është 10 për qind. Sa i përket ecurisë së aktivitetit sipas shoqërive që operojnë në këtë segment vihet re se vetëm tre prej tyre arritën të kenë një ecuri pozitive të primeve të shkruara bruto, përkatësisht: Eurosig, Albsig dhe INSIG.
