Avioni me një motor u rrëzua sot në një zonë banimi në Bursa, një provincë veriperëndimore e Turqisë. Avioni po fluturonte pranë aeroportit Yunuseli, një qendër për fluturimet stërvitore kur u rrëzua. Nuk dihen ende shkaqet e rrëzimit, ndërsa pas rrëzimit kanë marrë flakë edhe rrënojat e avionit.
Guvernatori i Bursës, Yakup Canbolat tha se një instruktor fluturimi dhe një pilot praktikant vdiqën nga aksidenti, ndërsa askush nuk u plagos. Pamjet nga vendi i ngjarjes treguan se flakët po ngriheshin midis ndërtesave ku u rrëzua avioni, me njerëz që nxituan të dilnin nga shtëpitë e tyre.
Guvernatori tha se avioni stërvitor civil ka të ngjarë të jetë rrëzuar për “një arsye teknike” pasi kushtet e motit ishin të përshtatshme për fluturimin. Guvernatori u tha gazetarëve se përplasja dëmtoi gjithashtu dy shtëpi dhe dy automjete.
Në qershor 2021, një tjetër aeroplan stërvitor u rrëzua pranë të njëjtës zonë, duke u zhytur në një pemishte aty pranë. Instruktori i fluturimit dhe piloti praktikant u plagosën në incidentin me një aeroplan Cessna.
Në vendngjarje kanë shkuar makina zjarrfikëse dhe ambulanca , raportojnë rrjetet televizive turke.
