Rrëzimi i bordurave të ARRSH-së në Unazën e Re gjatë protestës së mbrëmshme të banorëve të Astirit dhe djegia e koshave të mbeturinave nuk ka kaluar në heshtje.
Banorët e Astirit flasin për 11 të shoqëruar në polici. Lutfi Kastrati, pjesë e Kryesisë së banorëve, dha për Ora News dy emra.
Lutfi Kastrati: Gjatë ditës së sotme mendohet se ka pasur 11 të shoqëruar, por për momentin kam dy emra. Besim Çeku që është mbajtur në komisariatin numër 6 për disa orë, ndërsa Kujtim Ylli është në komisariatin numër 2. Atij i është plotësuar fletë-arresti për ta çuar në gjykatë me pretekstin protesta të paligjshme, shkatërrim të pronës publike, gjë që nuk është e vërtetë.
Ai tha se banorët e Unazës së Re janë të vendosur për të vazhduar protestat.
Lutfi Kastrati: Dhe sot e kemi në orën 5. Këtu në Unazën e Re punonjësit e Bashkisë kanë ditë që vazhdojnë punimet me prerjen e pemëve, heqjen e shtyllave. Kryesia e banorëve të Unazës së Re e ka parë të arsyeshme që të mos përfshihet në përplasje me punonjësit e bashkisë.
Banorët e Unazës së Re nuk do të merren as me ata banorë që kanë pranuar marrëveshjen e bashkisë për banesa sociale.
Ne protestojmë dhe do mbrojmë deri në fund çdo banor që është kundra prishjes së shtëpisë së tij. Ne kundërshtojmë prishjen e banesave tona dhe bizneseve tona. Tani jemi dhe kundër projektit, jemi kundër banesave sociale, nuk kemi nevojë për lëmoshë.Projekti është shumë korruptiv, ka një megavjedhje në kurriz të banorëve të Unazës së Re.
http://www.oranews.tv/article/rrezimi-i-bordurave-tek-unaza-e-re-policia-shoqeron-banore-te-astirit
