Kryetari i Bashkisë së Kavajës, Elvis Roshi, është dënuar për përdhunim dhe rrahje në bashkëpunim në Itali, por ka përfituar nga mos citimi i dënimit, parashikuar në legjislacionin italian.
Shqiptarja.com zbardh të vërtetën e dëshmive të penalitetit të kryebashkiakut të Kavajës dhe problemin e tij në shkuarën me drejtësinë italiane. Dy dëshmitë e publikuara nga mediat dhe vetë kryebashkiaku, janë dokumente të vërteta dhe zyrtare, por me një ndryshim të rëndësishëm, i cili ka krijuar moskuptim dhe mjegull.
Dëshmia që nuk citon dënimin.
Dëshmia e pastër e penalitetit, e paraqitur nga Elvis Roshi, “Çertifikatë Penale e Arkivit Gjyqësor”, është një dokument, i cili merret nga çdo subjekt dhe qytetar i zakonshëm, në përputhje me Nenin 25 të Dekretit Presidencial Nr 313, të vitit 2002. Po pse Roshi figuron i pastër në Çertifikatën Penale të Arkivit Gjyqësor dhe rezulton i dënuar në Çertifikatën e Arkivit Gjyqësor? Neni 25 parashikon mos citimin e dënimit, nëse subjekti është dënuar për herë të parë dhe më pak se sa dy vjet burg.
