Misioni i Romës për të bërë diçka që të mbetet në memorie, në transfertën e Madridit, mbetet ekstremisht i vështirë. Shifrat 0-2 të regjistruara në “Olimpiko” janë pothuajse e pamundur të përmbysen, ndërkohë që ka edhe shifra të tjera për të ritur edhe më shumë presionin në skuadrën e Spaletit. Reali i Madridit nuk ka pësuar asnjë gol gjatë këtij edicioni të Champions, në ndeshje e luajtura në “Santiago Bernabeu”. Në tre sfidat e Madridit të vlefshme për grupin A, “los blancos” kanë fituar 4-0 kundër ukrainasve të Shaktar, 1-0 ndaj francezëve të PSG-së, si dhe kanë shkatërruar 8-0 Malmoen. Pra Xheko, Peroti, Salah, El Sharaui dhe të tjerët duhet të thyejnë një tabu, në një nga ndeshjet më të rëndësishme të karierës së tyre.
