Albanologu rekomandon që vakuumi i krijuar të plotësohet përmes dokumentimit të historisë verbale
Historia e Çamërisë dhe të tjera mungojnë në Historinë e Shqipëri. Albanologu Robert Elsie, bën këtë konstatim dhe rekomandon vakuumi i krijuar, të mbushet përmes dokumentimit të historisë verbale. I pranishëm në në konferencën e mbajtur për këtë qëllim, në Fakultetin e Historisë dhe Filologjisë, Elsie theksoi se çamët kanë përjetuar histori të tmerrshme dhe ka ende njerëz që jetojnë e mund t’i rrëfejnë ato. Këto rrëfime sipas tij duhet të hyjnë në historinë zyrtare të Shqipërisë.
“Historia e Shqipërisë është shkruar nga të huajt, jo nga shqiptarët, të cilët kanë mbetur memecë në fakt. Nuk ka shumë burime, ndërkohë që ka shumë pjesë të historisë së Shqipërisë që nuk njihen fare. Dhe ajo që mungon, mbase mund të plotësohet nga historia gojore. Pjesa e munguar e historisë sonë mund të plotësohet kryesisht nga historia gojore, ajo që flitet, kontribues të së cilës mund të jenë edhe gazetarët, përmes intervistave që ata realizojnë me njerëz të ndryshëm. Por, në shumë raste, kjo gjë mund të arrihet nga vetë familjet, të cilat duhet të tregojnë interes të shkruajnë historinë e tyre, si në rastin e historisë çame.
Çamët kanë përjetuar gjëra të tmerrshme në fund të Luftës së Dytë Botërore. Ende edhe sot ka njerëz që janë gjallë, që i kanë përjetuar ato gjëra kur ishin të vegjël. Ata tani janë pleq, por fëmijët e tyre a nuk mund të pyesin dhe të interesohen se çfarë ka ndodhur? Duhet ta kemi të qartë, sepse nuk dimë shumë. Historia e Çamërisë është shkruar nga grekët”, tha albanologu Elsie.
* ky shkrim u botua në 27.al më 30 mars 2016
