Qeveria e kryeministrit Edi Rama e cilëson si një arritje të madhe vendosjen e satelitëve shqiptarë në hapësirë, në një kohë që vendi po vuan nga kriza ekonomike dhe rritja e çmimeve. Këtë bindje e ka treguar më së miri ministri i Mbrojtjes Niko Peleshi, i cili bëri sot një bilanc të institucionit që drejton për vitin që lamë pas.
Ai pohoi se ka nisur ndërtimi i Bazës Ajrore taktike të NATO-s në Kuçovë. Ndërsa dërgimin e satelitëve në hapësire e quajti si një risi me pak kosto dhe shumë eficensë.
“Nisi ndërtimi i Bazës Ajrore taktike të NATO në Kuçovë. Në vitin që sapo lamë pas u nënshkrua kontrata e shërbimit Satelitor në fushën e Mbrojtjes dhe Sigurisë. Një ngjarje tjetër me rëndësi është dhe rritja e pagave, historike doja të thoja, në masën 30%.
Ushtarakët duhet të trajtohen me dinjitet. Ky vit, rekord i projekteve të modernizimit të FA me mbështetjen e SHBA. Nisi zbatimin projekti për ngritjen dhe fuqizimin e Njësisë Ushtarake të Mbrojtjes Kibernetike Po ashtu përfundoi faza e parë e projektit të komunikimit Tokë-Ajër-Tokë (GAG).
Forcat e Armatosura do të ketë pjesë të saj sistemin raketor antitank “Javelin” dhe atë kundërajror “Stinger”. Nënshkruam marrëveshjen për shtimin e flotës ajrore me avionë luftarakë pa pilotë me kompaninë turke ‘Bayraktar’. SHBA aktivizoi në Shqipëri Shtabin e Përparuar të Komandës së Forcave Speciale amerikane.”, tha Peleshi.
