Kanë nisur diskutimet për prishjen e shkollave në zonat e dëmtuara nga tërmeti i 26 nëntorit.
Kryeministri Edi Rama tha se këto shkolla do të ndërtohen nga themelet me standardet më të mira europiane.
Janë 5 shkolla që kanë nisur shembjen ditën e sotme të cilat janë; “Sami Frashëri” në Tiranë, “Ramazan Subashi” 9-vjeçare në Vorë, “Sherif Dervishi” 9-vjeçare në Krujë, “16 Shtatori” në Shijak dhe “Charles Telford” në Kavajë.
Rama tha se shkollat e reja do të kenë një rritje të kapacitetit për klasa. Ndërsa shtoi se do të jenë të pajisura me laboratorë kimie, fizike, biologjie, biblioteka, hapësira multi-funksionale dhe salla të edukimit fizik si palestra dhe fusha për aktivitetet fizike. Kryeministri shtoi se edhe sallat e mësuesve do të jenë të gjitha të standartizuara, ndërsa nuk do të mungojë kabinet i psikologut, infermierisë, pistat e vrapit etj.
“Një element që do shtoja unë, është elementi që sjell situata e re e krijuar. Gjithë procesi i hapjes do jetë nje proces adaptimi dhe distancimi social, për këtë arsye duhet me fut elementin e kapacitetit dixhital për të pasur një kombinim mes mësimit online dhe mësimit në klasë për nxënësit. Deri kur kjo të ketë marrë fund me vaksinën, të kemi turne me një pjesë që vjen në klasë dhe një pjesë që vjen nga shtëpia. Duhet të pajisemi me një kapacitet të tillë, shkollat edhe fëmijët. Kjo duhet majt parasysh si komponent”, tha Rama.
