Ky nuk është një kantier ndërtimi, nga ato që kemi parë rëndom në të gjithë cepat e Tiranës, ku pas disa muajsh do të dallosh të mbijnë nga toka ndërtesa shumëkatëshe. Pikërisht ky është kantieri ku po punohet për rindërtimin e stadiumit “Qemal Stafa”.
Në fakt, për të qenë më korrekt, po ndërtohet një stadium modern dhe meqenëse këtu jetojmë dhe modernizmat janë kthyer në mani, emrat e vjetër nuk na shkojnë më për shtat, kështu që stadium do të quhet “Arena e Kombëtares”. Gjithsesi, e rëndësishme është se po punohet me një ritëm të lartë, pasi ndërtimi i tij sa më shpejt është i domosdoshëm jo vetëm për ekipin Kombëtar, por edhe për futbollin tonë, që është mbushur me skuadra nomade.
