Në kuadër të fushatës së rekrutimeve për ushtarë dhe detarë aktivë në Forcat e Armatosura, ministrja e Mbrojtjes, Mimi Kodheli zhvilloi një takim me studentë të fakulteteve të ndryshme të Tiranës.
Në bisedën me ta, ministrja Kodheli radhiti përparësitë që ka një i ri që arrin të bëhet pjesë e Forcave të Armatosura, duke përmendur mundësinë për karrierë bazuar në meritokraci, të ardhura të sigurta dhe kujdes shëndetësor falas për ta dhe familjet e tyre.
Ajo gjithashtu theksoi në mënyrë të veçantë mundësitë që kanë në FA të rinjtë që kanë një diplomë universitare, duke theksuar se në ushtri ka mundësi karriere thuajse për të gjithë profesionet.
Sa i përket mundësive për trajnime e studime jashtë vendit, e cila ngjalli interes të veçantë te studentët, ministrja Kodheli u tregoi atyre se Forcat e Armatosura dhe Ministria e Mbrojtjes kanë aktualisht rreth 300 përfaqësues në misione apo komanda jashtë Shqipërisë, duke konkurruar me Ministrinë e Punëve të Jashtme.
Fushata e aplikimeve për ushtarë/detarë aktivë në Forcat e Armatosura mbyllet më datë 17 mars 2017.
