Në Komisionin për Reformën Territoriale, Enea Hoti, Drejtor i Përgjithshëm Agjencia për Mbështetjen e Vetëqeverisjes Vendore (AMVV), tha se në tërësi është ulur borxhi në bashki dhe se është rritur numri i të punësuarve për shërbimin ndaj qytetarëve.
Enea Hoti: Rritja e administratës së bashkive nga 2021 është rreth 7 %. Kjo është e kuptueshme sepse që pas ndarjes së reformës, punonjësit e kopshteve dhe shkollave i kaluan pushtetit vendor nga ai qendror. Janë rritur dhe numri i edukatorëve në qoftë se ne kemi pasur rreth 1600 sot kemi më shumë se 5000 edukatore dhe 200 shkolla më shumë. Dhe zjarrfikësit i kanë kaluar pushtetit vendor dhe që paguhen nga qeverisja vendore, kemi rreth 500 zjarrfikës më shumë. Një element që do doja ta përmendja këtu është efiçenca fiskale e Bashkive borxhi që kishin dikur bashkitë janë ulur me 50% nga 12.7 miliard është rreth 6 miliardë dhe kjo tregon që ka një efiçencë në punën e bashkive. Të dhënat më të sakta i ka dhe Ministria e Financave që do vijnë të flasin më pak. Në 2015 u decentralizua menaxhimi i kanaleve ujitëse dhe nga 120 mijë ha toka të ujitur në 2013 në rreth 220 mijë sot që janë kryer me ndihmën e bashkive.
Nga ana tjetër, deputetja demokrate Dhurata Çupi tha se investimet janë bërë vetëm në qendrat e qyteteve.
Dhurata Çupi: Kjo reformë duhet të rishikohet dhe e them me shumë keqardhje se asnjë nuk ka thënë se kjo reformë shkon mirë dhe jo thjesht për të bërë politikë. 19,400 ka qenë numri i administratës së bashkive ndërsa sot është 38,600 për të mos llogaritur 3000 kontrata afatshkurtra të bëra para fushatës zgjedhore. Ju thoni se ka pasur shtim të administratës dhe rritje të shërbimeve. Ju keni thënë se për efekt të bashkimit, burimet njerëzore do të uleshin dhe borxhi duhet të ishte ulur. Ne sot kemi përqendrimin më të madh ndaj bashkive, si kontrolli i bregdetit, arsimit parashkollor, ujitjes kullimit etj që i keni deleguar vetëm numrin e punonjësve dhe pagat por bashkitë nuk i zhvillojnë asnjë nga këto kompetenca. Sot nuk kemi asnjë pronë të regjistruar në emër të bashkive që nga viti 2015. Duhet të bëjmë çmos ti japim më shumë autoritet këshillave të fshatit. Sot investohet vetëm në qendrat e qyteteve, fshatrat nuk kanë as transport publik, as pastrimin publik dhe as ndriçim sepse po nuk çove rrugën nuk kanë ku kalojnë makinat. A ka pas decentralizim të shtuar?
