Ambasadori amerikan vazhdon përpjekjet për kompromis mes palëve
Ambasadori amerikan Donald Lu u takua sot me presidentin Bujar Nishani për të diskutuar rreth ecurisë së reformës në drejtësi. Takimi i ambasadorit amerikan me presidentin Nishani vjen në një situatë kur dialogu mazhorancë-opozitë është bllokuar.
Ndërkohë që po zhvillohej takimi mes ambasadorit Lu dhe presidentit Nishani, në kryesinë e Kuvendit, ekspertët e nivelit të lartë po diskutonin për ecuinë e procesit të reformës në drejtësi, pavarësisht në se do të marrë pjesë ose jo opozita. Ekspertët e Partisë Demokratike thanë se nuk ishin njoftuar për të qënë pjesë e kësaj mbledhje.
Ekspertët e PD-së braktisën tryezën e bisedimeve duke akuzuar shumicën për mosreflektim ndaj rekomandimeve të Komisionit të Venecias. Ata pretendojnë se ekspertët e mazhorancës janë të vendosur për të mos reflektuar rekomandimet e Komisionit të Venecias, si dhe për të mos vlerësuar mundësinë për kompromis me opozitën. Me sa duket ekspertët e komisionit të Venecias do të kenë në tavolinë për të vlerësuar dy drafte, një nga mazhoranca dhe një nga opozita.
