Votë kundër Aneksit B ku parashikohet roli i ndërkombëtarëve në Veting, kanë dhënë edhe deputeti demokrat, Genc Pollo dhe ai i LSI-së, Vangjel Tavo
Jozefina Topalli, ka votuar kundër nenit ku parashikohet roli i ndërkombëtarëve në Veting. Gazeta Panorama raporton se sipas procesverbalit elektronik, mësohet se nuk ka votuar “Aneksin B” të Kushtetutës, i cili parashikon rolin e Operacionit Ndërkombëtar në procesin e vetingut. Gazeta “Panorama” ka verifikuar formularët e votimit dhe nga zbardhja e procesverbaleve rezulton se ish-kryetarja e Kuvendit, Jozefina u ka qëndruar deklaratave të saj për cenimin e sovranitetit.
Ashtu si Topalli, këtë nen nuk e ka votuar as kryetari i Komisionit të Medias, demokrati Genc Pollo, ndërkohë që vota e tretë që nuk iu bashkua linjës së Grupit ishte ajo e Vangjel Tavos së LSI-së. Në total “Aneksi B” i Kushtetutës mori 137 vota pro dhe vetëm 3 deputetë nuk morën pjesë në votim. Por, pavarësisht se tre deputetët nuk votuan këtë pikë të Kushtetutës së re, ata dhanë votën pro në parim dhe në tërësi, duke e çuar numrin e votave në 140, votimi më absolut i të gjitha kohërave.
