Dënimi i ushtarëve/ Piro Lutaj: Është njëlloj sikur autoritetet shqiptare të merrnin masa ndaj dhjetra flamujve grekë të vendosur në shtëpitë e shqiptarëve.
Deputeti i Partisë Socialiste, Piro Lutaj e ka cilësuar Greqinë një shtet racist, ndërsa presionet e Athinës i etiketon të ulëta.
Ky reagim vjen pas vendimit të autoriteteve greke për të dënuar rekrutët me origjinë shqiptare, të cilët dolën në një foto duke bërë simbolin e shqiponjës.
Në një postim në rrjetin social facebook, Lutaj shprehet se deklarata e Panos Kamenos për dënimin e ushtarëve vjen, pasi ai është në një pikiatë elektorale, por kjo vijon ai, nuk e motivon atë në përdorimin e gjesteve të tillë në dëm të reciprocitetit mes dy fqinjve.
Më tej, deputeti i PS-së u shpreh që deklaratat e ministrit grek të mbrojtjes janë të ulëta e për më tepër ndaj një fqinji dhe homologu anëtar i NATO-s.
“Bërja e simbolit të shqiponjës nga rekrutët me origjinë shqiptare, nuk kishte asnjë arsye që të konsiderohej e rrezikshme nga autoritetet greke, pasi është njëlloj sikur autoritetet shqiptare të merrnin masa ndaj dhjetra flamujve grekë, të cilët janë vendosur kudo nëpër banesa të shtetasve shqiptarë, kryesisht në jug të vendit”, u shpreh Lutaj.
.
