3 drejtorët e Burgjeve të emëruar nga LSI-ja kanë reaguar pas largimit të tyre nga puna për arsyen se po bënin fushatë elektorale.
Etnor Krakulli (Burgu i Fierit), Fatjon Fanaj (Burgu Jordan Misja, Tiranë) dhe Ahmet Bala (Burgu Rogozhinë) kanë deklaruar se do të padisin ministrin pasi shprehen se shkarkimi i tyre është politik.
Ne letër ata theksojnë se largimi i tyre është i rrezikshëm dhe mund të jetë bërë për qëllime të errëta që rrezikojnë Sigurinë Kombëtare.
“Shkarkimi yne ndodh pikerisht kur fushata zgjedhore ka afruar, dhe synon keqperdorimin e IEVP-ve nga partite politike, duke rrezikuar me kete akt dhe sigurine kombetare.”– shprehen drejtorët.
Letra e plotë:
Me anë të kësaj deklarate duam të denoncojmë aktin e paligjshëm dhe të paprecedent të shkarkimit tonë. Ditën e shtunë, në datën 3 qershor 2017 u njoftuam për të marrë pjesë në një mbledhje të zhvilluar me të gjithë Drejtorët e Burgjeve si dhe me Drejtorin e Përgjithshëm të Burgjeve në Ministrinë e Drejtesisë. Por pas përfundimit të kësaj mbledhjeje, u çuditëm kur pamë vetëm në media, lajmin për largimin tonë nga detyra me motivacionin e përfshirjes sonë në fushatën elektorale. Ky motivacion është i pabazë, i gënjeshtërt, i pafaktuar dhe tendencioz. Për më tepër në këto momente është shoqëruar dhe me akte të tjera antiligjore proceduriale, për të cilat ne do të vijojmë ndjekjen në rrugë ligjore.
Është shqetësuese që një vendim i tillë merret në këtë situatë, kur institucionet të tilla që ne drejtojmë ndodhen aktualisht pa drejtues, çka të bën të mendosh se ky veprim nuk është i rastësishëm dhe pas tij ndoshta fshihet një qëllim edhe më i errët.
Shkarkimi ynë ndodh pikërisht kur fushata zgjedhore ka afruar, dhe synon keqpërdorimin e IEVP-ve nga partitë politike, duke rrezikuar me këtë akt dhe sigurinëkombëtare.
Ne do të vazhdojmë të ndjekim rrugën ligjore për të vënë në vend dinjitetin tonë, duke kallëzuar penalisht Ministrinë e Drejtësisë dhe Drejtorin e Përgjithshëm të Burgjeve.
Etnor Krakulli IEVP Fier
Fatjon Fanaj IEVP Jordan Misja Tiranë
Ahmet Bala IEVP Rrogozhinë
