Partia Demokratike i është përgjigjur menjëherë ministrit të Jashtëm në detyrë, Gent Cakaj, i cili deklaroi se OSBE/ODIHR në raportin për zgjedhjet e 30 qershorit i shpalli ato të rregullta dhe kritikonte më shumë opozitën.
Në një deklaratë për mediat, Sekretari i Përgjithshëm i PD, Gazment Bardhi tha se për herë të parë në historinë e vëzhgimit të zgjedhjeve nga OSBE/ODIHR nuk specifikohet që zgjedhjet ishin demokratike.
Kjo sipas Bardhit, nuk është përgjegjësi e opozitës pse KQZ ka shkelur ligjin, pse gjyqtarët e Kolegjit Zgjedhor ishin nën presionin e qeverisë apo pse punonjësit e administratës u shantazhuan.
“Për herë të parë në historinë e vëzhgimit të zgjedhjeve nga OSBE/ODIHR nuk specifikohet që zgjedhjet ishin demokratike. Për herë të parë specifikohet se veprime dhe sjellje të qeverisë, institucioneve të tjera përfshi gjykatën dhe prokurorinë, kanë qenë tërësisht në kundërshtim me ligjin.
Për këtë nuk mund të jetë përgjegjëse opozita. Opozita nuk ka asnjë përgjegjësi pse KQZ ka shkelur ligjet e shtetit, pse gjyqtarët e Kolegjit Zgjedhor kanë qenë nën presionin e qeverisë, pse punonjësit e administratës u shantazhuan dhe kërcënuan. Raporti skanon të gjithë shtetin privat që ka ndërtuar Edi Rama”, tha Bardhi mes të tjerash.
I pyetur më tej për një mundësi dialogu për reformën zgjedhore, Bardhi theksoi se kjo e fundit nuk zgjidh gjithçka.
“Raporti shprehet qartë se opozita u detyrua të dorëzonte mandatet. Ju e mbani mend që ne propozuam një masë legjislative për të garantuar shkëputejn e krimit nga politika. Ky ishte shkaku që na detyroi ne të linim mandatet. Kjo solli largimin tonë nga komisioni i reformës. Sigurisht që janë tre raportte për OSBE/OHIHR, por edhe në ato ndryshime do të bëhen, përsëri nuk janë garanci e mjaftueshme për zgjedhje të lira. Të gjithë e dimë, vjedhja e votave, shantazhet janë vepra penale, problemi është që ky ligj nuk zbatohet. Garanci për zgjedhje të lira është vullneti politik. Pa asnjë dyshim realizimin e reformës zgjedhore, cështje të tjera që kanë nevojë të reformohen. Qendrimi logjik dhe i arsyeshëm është që këto nuk mjaftojnë për të garantuar zgjedhje të lira. Kjo është çështje vullneti”, tha ai.
