Borxhi 72.3 për qind të PBB, konsumi privat e publik në rënie
Komisioni Europian publikoi sot raportin e tremujorit të parë 2016. Në të referohen zhvillimet në vendeve kandidate dhe potenciale kandidate përfshirë edhe Shqipërinë. Raporti sjell një pamje të përgjithshme të shifrave të ekonomisë shqiptare, shifra të cilat nga burimet qeveritare shpesh paraqiten ndryshe. Kështu sipas raportit të KE në vitin 2015 rritja ekonomike në Shqipëri ishte 2.6 për qind, konsumi publik dhe privat kanë rënë dhe investimet janë ngadalësuar. Rënia e konsumit qeveritar në bazë vjetore ka rënë me 3.7 për qind, dhe ka patur trend rënës për të katërtin tremujor me radhë.
Kontributin më të madh në rritje ekonomike e ka dhënë ndërtimi, i cili ka kompensuar rënien në bujqësi, industry dhe energjetikë.
Shkalla e papunësisë për moshat 15-64 vjeç është rritur me 0.3 pikë përqindjeje në terma vjetorë, duke shkuar në 17.7 për qind.
Në fund të 2015, stoku i borxhit të jashtëm bruto ishte 10,1 për qind më i lartë se një vit më parë, kryesisht për shkak të rritjes së huamarrjes së qeverisë. Borxhi i jashtëm qëndroi në 74 për qind të PBB-së. Niveli i lartë i kredive me probleme (NPL) vazhdoi të ndikojë mbi kreditimin, dhe në fund tremujorin e katërt të vitit 2015 ishte 20.2 për qind.
Të ardhurat buxhetore të 2015 kanë qenë 8.2 për qind më pak se planifikimi fillestar dhe 4.5 për qind më pak se plani i rishikuar në korrik 2015. Shpenzimet buxhetore kanë mbetur 7.5 për qind nën planin fillestar.
Situata paraqitet ndryshe në muajt e parë të 2016. Në janar shkurt buxheti ka rezultuar me një tepricë të lartë dhe të ardhurat janë tejkaluar me 20 për qind. Pas një rritje 6.7 për qind me bazë vjetore, borxhi publik qëndroi në 72,3 për qind të PBB-së në fund të 2015.
