Ministria e Brendshme italiane ka dërguar në parlament raportin 6 mujor të Departamentit të Hetimeve Anti-Mafia për periudhën korrik-dhjetor 2017. Në raport theksohet ndër të tjera trafikimi i lëndëve narkotike nga Shqipëria dhe fuqizimi i grupeve shqiptare në territorin italian.
Sipas mediave italiane, në raport thuhet se përpos pikave të tjera ‘Foggia është bërë një udhëkryq strategjik. Në veçanti, brigjet në Gargano janë kthyer në pikën kryesore të hyrjes së mariuanës nga Shqipëria’.
Gjithashtu në raport bëhet edhe një përmbledhje e sasisë së drogës që është sekuestruar nga Korriku deri në dhjetor të vitit 2017 dhe operacionet përkatëse. Organizatat kriminale shqiptare bashkëpunojnë për trafikun e drogës në Itali me grupet vendasve, vijon më tej raporti. Ndërkohë që droga e sekuestruar llogaritet në miliona euro, grupet shqiptare janë të njohura në Itali jo vetëm për trafik, por edhe grabitje të banesave.
