Pas publikimit të raportit të Organizatës së Kombeve të Bashkuara, në të cilin parashikohej se në vitin 2100 Shqipëria do të mbetet me vetëm 512 mijë persona, ka reaguar Presidenti i Republikës, Ilir Meta.
Në një status në“Facebook”, Meta shkruan se “kambanat e alarmit po bien”, duke e cilësuar shpopullimin e Shqipërisë si rrezikun e vërtetë rus, dhe një ndër sfidat më madhore, që kërkon zgjidhje urgjente.
“Kambanat e alarmit po bien! Stop shpopullimit të Shqipërisë! Ky është “rreziku i vërtetë rus” që i kanoset vendit! Kjo është sfida më madhore që kërkon urgjent dialog, zgjidhje, dhe kthimin e shpresës për të gjithë shqiptarët! 9 kushtet e Bundestagut janë harta e rrugës së Shqipërisë europiane! Koha është tani! Nuk mund të ketë Shqipëri pa shqiptarë!”, shkruan Kreu i Shtetit.
