Shqiptarët janë edhe trafikantët kryesorë të heronës
Qendra Monitoruese Europiane për Drogën e cilëson Shqipërinë një prej prodhueseve kryesore të kanabisit në Europë. Në raportin më të fundit të publikuar nga kjo qendër thuhet se situata mund të ketë ndryshuar disi me operacionet e kryera, por megjithatë Shqipëria, Serbia, Bullgaria dhe Kosova, mbeten prodhues masivë të kanabisit. Destinacionet më kryesore të tregtimit të kësaj lënde narkotike janë Greqia, Italia, Holanda, Hungaria, Republika Ceke si dhe Austria. Gjithashtu vlerësohet se kanabisi shqiptar tregtohet në një sasi të konsiderueshme edhe në Francë e në Gjermani.
Sipas raportit trafikantët më të mëdhenj të kanabisit në Europë janë marokenët të cilët garantojnë transportin si dhe shitjen në tregjet e kontinentit të vjetër. Në shumicën e rasteve, këta trafikantë bashkëpunojnë me prodhuesit shqiptarë. Ndërkohë shqiptarët klasifikohen edhe si trafikantët kryesorë të heronës së bashku me turqit dhe pakistanezët. Në dokument thuhet se këto grupe kanë krijuar rrjete mjaft të fuqishme si dhe organizata kriminale të cilat favorizojnë transportin e jashtëligjshëm të heroinës si dhe tregtimin e saj. Në terma të përgjithshëm, raporti gjykon se europianët shpenzojnë për drogëra të jashtëligjshme 24 miliardë euro në vit.
