Në 2016 parashikohet që ekonomia shqiptare të rritet 3.2 %
Investime për të mbështetur rritjen. Kjo është këshilla e Bankës Botërore për ekonomitë e rajonit tonë. Në prezantimin e raportit “Ribalancim për një rritje me të fortë” nga Ellen Goldstein, Drejtore Rajonale e BB për Europën Juglindore, u tha rimëkëmbja e rritjes ekonomike në Europën Juglindore duhet të mbështetet nga investimet. Duke qenë se konsumi vendas në të gjithë rajonin ka mbetur shumë I ulët në raport thuhet se rigjallërimi i ekonomisë do të mbështetet nga investimet e huaja dhe ato vendase.
Duke folur specifikisht për Shqipërinë përfaqësuesja e BB Tahseen Sayed ka përmendur se ekonomia në 2015 u rrit me 2.6 për qind dhe kjo u mbështet nga investimet e fuqishme private. Ndërkohë për 2016 parashikohet një rritje ekonomike 3.2 për qind. “Investimet për Gazsjellësin Trans-Adriatik dhe një hidrocentral në Shqipërinë e Jugut do të ndikojnë në rritjen e kërkesës së brendshme” ka deklaruar Sayed.
Ndër këshillat që sjell raporti për ekonominë shqiptare janë thellimi i reformave strukturore sidomos në energjetikë, financia, menaxhim i investimeve publike. Ndërkohë në raport citohet edhe se “Reforma në Drejtësi është thelbësore për klimën e investimeve dhe rigjallërimin e kreditimit”.
Sipas raportit, shqetësim në Shqipëri mbetet norma e papunësisë pasi gjysma e saj kanë papunësi afatgjatë. Po ashtu ritmi i zbutjes së varfërisë në Shqipëri verehet se ka qenë më i ngadaltë se në rajon.
