Ramush Haradinaj ka postuar nje deklarate ku njofton dorëzimin e mandatit te deputetit te parlamentit te Kosoves.
Ne deklarate thuhet:
“Duke e parë se Kuvendi i Kosovës, është shndërruar në një institucion për mbluesën e shkeljeve kushtetuese që i ka bërë qeveria; duke e parë se Kuvendi është shndërruar në një vend ku deputetët me urdhër politik, tërhiqën zvarrë nga policia; dhe duke e parë përjashtimin arbitrar të deputetëve të Opozitës nga Kuvendi, jap dorëheqje të parevokueshme nga mandati i deputetit të Kuvendit të Republikës së Kosovës.
Në mandatin tim prej deputeti, jam munduar që të ngre shqetësimet e mia serioze për çështje me interes për vendin, duke përfshire edhe gabimet që po bëhëshin me nënshkrimin e dy marrëveshjeve kontestuese, emarkacionin dhe Asociacionin, por jam injoruar nga uzurpatorët e pushtetit e të Kuvendit.
Pikërisht si rezultat i një injorimi të tillë dhe e një papërgjegjësie ekstreme të pushtetarëve të këtij vendi, e vetmja rrugë veprimi e imja si deputet, kishte mbetur logjika e kundërshtimit me gaz.
Pas ditës së sotme ndërkaq, konsideroj se Kuvendi i Republikës së Kosovës, nuk është më një institucion demokratik dhe rrjedhimisht unë nuk e shoh vetën më pjesë të kësaj legjislature.”
Ndërkohë, kreu i Kuvendit të Kosovës, Kadri Veseli, përmes një konference të jashtëzakonshme ka ftuar për të disatën herë opozitën që të kthehet në Kuvend për të dialoguar. Sipas Veselit, dialogu është e vetmja zgjidhje për të zgjidhur mosmarrëveshjet mes palëve.
“Ftoj opozitën për dialog të hapur brenda institucioneve të Republikës së Kosovës. Dialogu është e vetmja rrugë për të zgjidhur mosmarrëveshjet në të mirë të qytetarëve të vendit”.
Në konferencë, ai ka dënuar veprimet e opozitës, të ngjashme prej një kohe të gjatë tashmë në këtë krizë politike që ka kapluar Kosovën, e sidomos ato të ditës së sotme me hedhjen sërish të gazit lotsjellës dhe përleshjes së policisë me deputetët opozitarë.
“Kolegët tanë vepruan në mënyrën më të vrazhdë, në mënyrë jo demokratike. Ata po dëmtojnë procesin, po na dëmtojnë neve, por edhe veten. Ata janë duke dëmtuar një vlerësim historik për Kosovën”, tha Veseli.
Sipas kreut të Kuvendit, çdo veprim i tillë – si ai i opozitës, – është veprim sa i dëmshëm, aq dhe dëshpërues e i papranueshëm.
“Kuvendi është i vendosur të vazhdojë punën e tij drejt zhvillimit ekonomik dhe integrimit euroatlantik të Kosovës”, tha Veseli në deklaratën e shkurtër, që vijoi më pas me përgjigje ndaj pyetjeve të gazetarëve të pranishëm.
