Kryeministri Edi Rama ka treguar një pjesë nga biseda me Atin e Shenjtë Papa Françeskun në Vatikan. Me anë të një postimi në Facebook, Rama shkruan se Papa Françesku flet për Shqipërinë dhe shqiptarët me një dashuri të veçantë, duke shtuar se i është mirënjohës Shqipërisë që është faktor paqeje në rajon.
Papa Françesku flet për Shqipërinë dhe shqiptarët me një dashuri të posaçme, ruan të freskët kujtimin e vizitës së tij të parë jashtë Vatikanit në Shqipëri, shpreh mirënjohje për rolin e Shqipërisë si faktor paqeje në rajon, po edhe si një vend e një popull model solidariteti njerëzor, qysh me shpëtimin e hebrenjve e deri në ditët tona me mikpritjen për refugjatët afganë dhe përcjell bekimet e tij për të gjithë shqiptarët, duke përshëndetur gjithashtu bashkëpunimin më të ri mes Selisë së Shenjtë dhe Qeverisë Shqiptare, për krijimin e destinacionit të pelegrinazhit me përmendoren e me tempullin kushtuar Shenjtores Shqiptare, Nënë Tereza, në Tiranë'”, shkruan Rama.
