Kur na ndajnë edhe pak ditë nga data e zgjedhjeve vendore në Dibër kandidati i maxhorancës Muharem Rama ka vijuar takimet me banorë në fshatin Ushtelenzë dhe në lagjen Dobrovë të qytetit të Peshkopisë. Muharem Rama ka kërkuar voten në 11 shtator duke premtuar më shumë investime, bëjnë të ditur burimet e oranews.
Rama: Ashtu siç kam qenë shërbëtori juaj gjatë punës së përditshme në spital ashtu do të jem edhe në bashki. Do ti keni dyert e hapura dhe unë do të jem në shërbimin tuaj për vitet e ardhshme.
Pjesë e këtyre takimeve ishte edhe Kordinatori i PS-së për Qarkun Dibër Damian Gjiknuri i cili akuzoi se Partia Demokratike po bën propagandë me premtime që nuk kanë lidhje me zgjedhjet e pjesshme lokale.
Gjiknuri: Ne vijmë ballëlartë. Kemi zgjedhur një njeri të shkëlqyer, që i ka shërbyer popullit. Garancia më e mirë për qytetarin e parë tuaj është karakteri i njeriut. Jeta ju ka mësuar me shumë eksperienca. Vendosini përballë njerëzit dhe shikoni cili është njeriu që i ka shërbyer njerëzve në nevojë?! Cili është njeriu që nuk e ka braktisur Dibrën?!
Afrimi i datës së mbajtjes së Zgjedhjeve për Bashkinë e Dibrës ka intensifikuar takimet e kandidatëve me banorët në përpjekje për të siguruar fitoren.
/oranews/
