Edi Rama përmes një postimi në Facebook u kërkon të gjithë shqiptarëve që të tregojnë eksperiencat e tyre negative në zyrat e shtetit.
Kreu i qeverisë bën thirrje që të denoncohen emrat e drejtuesve dhe punonjësve që i kanë bërë të ndihen të fyer në zyrat e shtetit në mënyrë që të hartohet raporti që do të jetë edhe faza e parë për reformimin e administratës.
“Eksperienca juaj negative
Shumëkush prej jush ka të paktën një eksperiencë negative, të jetuar apo të dëgjuar nga familjarë a miq, në zyrat e shtetit. Do t’i isha falenderues kujtdo prej jush që do ta ndante një eksperiencë të tillë këtu.
Nëse do të kishte edhe emra konkretë drejtuesish a punonjësish të zyrës përkatëse, edhe më mirë akoma.
Për të bashkëqeverisur me sukses në katër vitet e ardhshme është shumë e rëndësishme që çdo njeri i zakonshëm, të ngrejë zërin kur del i pakënaqur apo, ende më keq, i fyer nga një zyrë shteti.
Platforma e Bashkëqeverisjes Shqipëria që duam, e cila do t’ju jepet për gjykim në formë paraprake në fillim të javës, do të sigurojë lidhjen tuaj direkte me kabinetin qeveritar, edhe për rastet e eksperiencave negative në zyrat e shtetit.
Komentet tuaja në këtë postim, na ndihmojnë shumë për të nxjerrë një raport të veçantë për grupin që po punon për reformimin rrënjësor të rrjetit të zyrave të shtetit.
Faleminderit dhe mos ngurroni ju lutem”, ka shkruar kryeministri.
