Kryeministri Edi Rama ka dhënë një tjetër intervistë për mediat e huaja, këtë herë për atë spanjolle “TVE”. Rama ka folur për rrugëtimin e Shqipërisë drejt BE, duke përsëritur faktin se, sipas tij arsyeja përse hapja e negociatave nuk është realizuar deri më sot është për shkak të mënyrës së si BE ka vendosur të punojë në rajon.
I pyetur lidhur me faktin nëse duhet të “hiqen qafe” disa perceptime që procesi të vazhdojë Rama tha se ato i përkasin të kaluarës dhe se perceptimi me realiteti janë shumë larg.
Kryeministri u shpreh se sigurisht puna që duhet të bëjnë vendet e rajonit për t’u bërë pjesë e BE është e madh, por sipas tij meritojnë të hapin negociatat.
“Ne jemi vende që kemi ende shumë për të bërë për të përmbushur të gjitha kushtet për anëtarësimin në Bashkimin Evropian, por ne meritojmë të ndërmarrim hapa të tjerë dhe të fillojmë negociatat formale. Perceptimet kanë të bëjnë me të kaluarën, me një komunikim që nuk është ende i rrjedhshëm, por mund t’ju them se të gjithë po na thonë se ka një ndryshim të madh midis asaj që perceptohet dhe realitetit. Midis tyre turistët spanjollë që udhëtojnë në Shqipëri, gjithnjë e më shumë në numër. Sigurisht që ne duhet të vazhdojmë me reformat tona të modernizimit, me përmirësimin e qëndrueshëm të ekonomive dhe shoqërive tona, me ndërtimin e procesit institucional dhe, përfundimisht, me përparimin drejt përmirësimit të mjedisit ekonomik dhe social. Siç ju thashë, këto janë sfida për vendet që janë ende në mes të rrugës.”, u shpreh ai.
Kreu i qeverusë është pyetur edhe për tensionet mes Kosovës dhe Serbisë, për të cila Rama tha se janë pjesë e procesit.
“Tensionet janë pjesë e një procesi. Ne nuk mund të presim që një proces paqeje të vazhdojë pa probleme dhe pa tension. Lajmi i mirë këtu është se tensionet rriten dhe bien ndërsa të dyja palët vazhdojnë të flasin dhe të përpiqen të gjejnë zgjidhjet e nevojshme për njerëzit. Nuk është si në të kaluarën. Ekziston një ndryshim i madh sepse tani ne kemi bashkëpunim rajonal, me takime të shumta dhe me takime paraardhëse. Sigurisht, Kosova është problemi i fundit i hapur dhe i pazgjidhur i trashëguar nga shpërbërja e ish -Jugosllavisë. Dhe, pa dyshim, njohja e tij si shtet sovran i pavarur i Serbisë është kapitulli i fundit në historinë e dhimbshme jugosllave,” tha Rama.
